Петр Митрофанович Васильев аатынан Соловьев орто оскуолата төрүттэммитэ 100 сылын көрсө, анал байыаннай дьайыыга олохторун толук уурбут, дойдубут хорсун уолаттарын, бастыҥ спортсменнарбытын кэриэстээн, Өрөспүүбүлүкэтээҕи сахалыы ыстаныыларга аһаҕас турнир тэрилиннэ.
Күрэхтэһии — уолаттарбыт сырдык мөссүөннэрин үйэтитиигэ, турнирга аналларын суолун сулус оҥостубут дьоруойдарбытын, сахалыы ыстаныыларга Россия спордун маастара Станислав Захарович Федоров, көҥүл тустууга Россия спордун маастара Виктор Викторович Илларионов, «Азия оҕолоро» норуоттар икки ардыларынааҕы оонньуулар чэпчэки атлетикаҕа призера Витaлий Витальевич Захаров, сахалыы ыстаныыларга республика чемпиона, призера Дмитрий Илларионович Попов ааттарын көлүөнэттэн көлүөнэҕэ тиэрдиигэ ананна. Кинилэр олохторо, хорсун быһыылара биһиги бүгүҥҥү күүспүт уонна киэн туттуубут.
Кылыыһыттар куоталаһыыларыгар атын улуустартан үөрэнэ кэлбит Д.П. Коркин аатынан Чурапчытааҕы олимпийскай эрэллэри бэлэмниир өрөспүүбүлүкэтээҕи интернат-оскуола, Семен Андреевич Новгородов аатынан Чурапчытааҕы орто оскуола, Мугудай, Хадаар, Болугур нэһилиэктэриттэн, Таатта, Үөһээ Дьааҥы, Өлүөхүмэ улуустарыттан бааллар.
Күрэх арыллыытыгар эдэр кылыыһыттары Россия уонна Саха сирин хотугу дэгит күрэскэ спордун маастара, Мырыла ыччата Михаил Соловьев салайан киллэрдэ. Соловьев орто оскуолатын үөрэнээччилэрэ тэрээһини киэргэттилэр. Кэрэ таҥастаах, чаҕылхай талааннаах, тупсаҕай туттуулаах «Күрүлгэн» үҥкүү бөлөҕө (сал. Күннэй Николаева) ыалдьыттары, көрөөччүлэри уонна күрэсчиттэри бэйэлэрин иэйиилээх үҥкүүлэринэн эҕэрдэлээтилэр. Санаайа Саввина бэйэтин ураты, ылбаҕай куолаһынан иэйиилээх ырыаны бэлэхтээн, көрөөччүлэр сүргэлэрин өрө көтөхтө.
Дьоруойдарбыт сырдык ааттарын ахтан-санаан, улуустааҕы депутаттар мунньахтарын салайааччыта Яков Павлович Оконешников, Чурапчы улууһун сахалыы ыстаныыларга федерациятын салайааччыта Владимир Дмитриевич Сивцев, П.М. Васильев аатынан Соловьев орто оскуолатын дириэктэрэ Лена Егоровна Яковлева, күрэх сүрүн судьуйата Павел Дмитриевич Собакин эҕэрдэ уонна махтал тылларын тиэртилэр.
Кыргыһыы толоонугар охтубут байыастар төрөппүттэрэ, кэргэттэрэ, оҕолоро эйэлээх олоххо олорон үөрэнэн, үлэлээн ааспыт кэмнэрин, үтүө майгыларын сырдаттылар. Яков Павлович бииргэ студеннаабыт доҕорун Станислав Захаровиһы бииргэ алтыһан үөрэммиттэртэн, анал байыаннай дьайыыга барыар дылы табаарыстаһан, бултаан алтаан сылдьыбыттарын, киһи быһыытынан үтүө майгытын ахтан санаан ааста. Уолаттар бары антах да сылдьан дойдуларын чиэһин үрдүктүк туппуттарын, бойобуой табаарыстарыгар күүс-көмө, сүбэ-ама, тирэх, бастыӈ табаарыс буолалларын кэпсээтилэр.
Анал байыаннай дьайыы бэтэрээнэ, сураҕа суох сүппүт буойун Виталий Витальевич Захаров үөрэммит, үлэлии сылдьыбыт оскуолатыгар 100 сыллаах юбилей чэрчитинэн 100000 сертификаты атах оонньуута үүнэн-сайдан, эт-хаан өртүнэн сайдыылаах ыччаттары, элбэх маастардары иитэн таһааралларыгар; нэһилиэкпитигэр, оскуолабытыгар аата ааттана туруо диэн эрэнэн туран оскуола коллективыгар, физкультура учууталларыгар, чуолаан тренер Чиркоев Иван Ивановичка оҕолору утумнаахтык дьарыктыырыгар баҕаран туран спортивнай тэриллэри ыларыгар туттардыбыт. Ону тэҥэ Станислав Федоров аҕата Захар Иванович уола Вячеслав тренер үлэтин өйдөөн-өйөөн уу харчыннан бэйэлэрин сэмэй бэлэхтэрин туттардылар.
Биир санаанан түмсэн… Тэрээһин сүргэни көтөҕөр таһымҥа ааһарыгар сүрүн спонсордар, дьоруойдарбыт чугас дьонноро, доҕотторо улахан өйөбүл буоллулар. Станислав Федоров аҕата Захар Иванович уонна уола Вячеслав, чугас аймахтара, Мырылаҕа бииргэ үөрэммит оҕолоро, Чурапчытааҕы педагогическай училище, ону тэҥэ Чурапчытааҕы физкультура уонна спорт институтутугар бииргэ үөрэммит доҕотторо; Дмитрий Попов кэргэнэ Саргылаана Михайловна, ииппит ийэтэ Айталина Ивановна, тэҥҥэ улааппыт убайдыы-бырааттара, чугус аймахтара, бииргэ үөрэммит оҕолоро, доҕотторо, Дьокуускай куорат иккис нүөмэрдээх оскуолатын дириэктэрэ Владимиров В.М. Виктор Илларионов кэргэнэ Евдокия Петровна, интернат оскуолаҕа бииргэ үөрэммит оҕолоро, Мырылаҕа бииргэ улааппыт доҕотторо. Виталий Захаров төрөппүттэрэ Елена Васильевна, Виталий Николаевич, бииргэ төрөөбүттэрэ, чугас аймахтара, бииргэ үөрэммит доҕотторо, учууталлара — бары биир санаанан түмсэн, кинилэр ааттарын кэриэстээтилэр.
П.М. Васильев аатынан Соловьев орто оскуолата, Соловьев нэһилиэгин сахалыы ыстаныыларга спорт маастардара, оскуола мецената Сергей Леонидович Тихонов, «Патриот» Саха сирин ыччатын киинэ, Чурапчы улууһун спордун салалтата, Чурапчы улууһун үөрэҕин салалтата, Баһылай Манчаары аатынан өрөспүүбүлүкэтээҕи төрүт көрүҥнэри сайыннарар «Модун» спортивнай киин, Чурапчы улууһун сахалыы ыстаныыларга федерация салайааччыта Владимир Дмитриевич Сивцев, Семен Андреевич Новгородов аатынан Чурапчы орто оскуолатын физкультураҕа учуутала Владислав Николаевич Кривошапкин уонна Соловьев орто оскуолатын «Боотур Кыһата» интернат үлэһиттэрэ анал бириистэри туруордулар.
Дьоруойдарбыт ааттара — үйэлээх, кинилэр сырдык мөссүөннэригэр сүгүрүйэбит!
Кылыы, ыстаҥа уонна куобах түмүгүнэн кыайыылаахтар маннык ааттаннылар:
VIII кылаастан кыра уолаттар
I үрдэл: Виктор НИКУЛИН — Мырыла (67м 43см) — 10 000 солк.
II үрдэл: Күндүл ПЕСТЕРОВ — ЧРССШИОР (62м 00см) — 6 000 солк.
III үрдэл: Максим СОБАКИН — Мырыла (60м 56см) — 4 000 солк.
Бириис пуондатын туруордулар: Виктор Илларионов Чурапчыга бииргэ үөрэммит оҕолоро.
Анал ааттары туттардылар:
- «Бастыҥ ыстаныык» — Виктор НИКУЛИН: наҕарааданы туттардылар Виктор Илларионов Мырылаҕа бииргэ үөрэммит доҕотторо.
- «Эдэр кэскиллээх ыстаныык» — Максим СОБАКИН: наҕарааданы туттарда Виктор Илларионов кэргэнэ Ева Илларионова.
IХ кылаас уолаттара
I үрдэл: Роман ПОТАПОВ — Мырыла/Үөһээ Дьааҥы (75м67см) — 10 000 солк.
II үрдэл: Александр УШКАНОВ — Мырыла/Өлүөхүмэ (68м03см) — 6 000 солк.
III үрдэл: Арчын СОБАКИН — Мырыла (67м20см) — 4 000 солк.
Бириис пуондатын туруордулар: Станислав Федоров чугас аймахтара.
Анал ааттары туттардылар:
- «Бастыҥ ыстаныык» — Роман ПОТАПОВ: наҕарааданы туттардылар Станислав Федоров Чурапчытааҕы педагогическай училище бииргэ үөрэммит оҕолоро.
- «Эдэр кэскиллээх ыстаныык» — Арчын СОБАКИН: наҕарааданы туттардылар Станислав Федоров Мырылаҕа бииргэ үөрэммит доҕотторо.
- «Бастыҥ куобахчыт» — Александр УШКАНОВ: наҕарааданы туттарда Чурапчытааҕы физкультура уонна спорт института.
- «Кыайыыга дьулуурун иһин» — Василий СМИРНИКОВ: наҕарааданы туттарда Дмитрий Попов кэргэнэ Саргылана Михайловна.
Х кылаас уолаттара
I үрдэл: Марк НИКИТИН — Мырыла/Өлүөхүмэ (73м45см) — 10 000 солк.
II үрдэл: Дмитрий КРАСИЛЬНИКОВ — ЧСОШ-1 (66м41см) — 6 000 солк.
III үрдэл: Дорофей ИВАНОВ — Мырыла (66м08см) — 4 000 солк.
Бириис пуондатын туруордулар: Дмитрий Попов чугас аймахтара.
Анал ааттары туттардылар:
- «Бастыҥ ыстаныык» — Марк НИКИТИН: наҕарааданы туттарда Дмитрий Попов учуутала Василий Михайлович.
- «Эдэр кэскиллээх ыстаныык» — Дорофей ИВАНОВ: наҕарааданы туттардылар Дмитрий Попов оҕо сааһын доҕотторо.
- «Бастыҥ куобахчыт» — Дмитрий КРАСИЛЬНИКОВ: наҕарааданы туттардылар Дмитрий Попов оскуолаҕа бииргэ үөрэммит оҕолоро.
ХI кылаас уолаттара
I үрдэл: Валентин ВЛАСОВ — Мырыла/Өлүөхүмэ (75м96см) — 10 000 солк.
II үрдэл: Геннадий ВАСИЛЬЕВ — Мырыла/Үөһээ Дьааҥы (64м56см) — 6 000 солк.
III үрдэл: Виталий ОКОНЕШНИКОВ — Мугудай (59м04см) — 4 000 солк.
Бириис пуондатын туруордулар: Виталий Захаров чугас аймахтара.
Анал ааттары туттардылар:
- «Бастыҥ ыстаныык» — Валентин ВЛАСОВ: наҕарааданы туттарда оскуола мецената Сергей Леонидович Тихонов.
- «Эдэр кэскиллээх ыстаныык» — Геннадий ВАСИЛЬЕВ: наҕарааданы туттардылар Виталий Захаров оскуолаҕа бииргэ үөрэммит оҕолоро.
Х кылаас кыргыттара
I үрдэл: Айгуль ПРОКОПЬЕВА - Мырыла/Таатта (54м85см) — 10 000 солк.
II үрдэл: Виктория ЗАРОВНЯЕВА - ЧРССШИОР (50м26см) — 6 000 солк.
III үрдэл: Регина МЕРКУРЬЕВА - ЧРССШИОР (49м18см) — 4 000 солк.
Бириис пуондатын туруордулар: Петр Митрофанович Васильев аатынан Соловьев орто оскуолата.
Анал ааттары туттардылар:
- «Бастыҥ ыстаныык» — Айгуль ПРОКОПЬЕВА: наҕарааданы туттардылар Соловьев нэһилиэгин сахалыы ыстаныыларга спорт маастардара уонна Чурапчы улууһун сахалыы ыстаныыларга федерация салайааччыта Владимир Дмитриевич Сивцев.
- «Эдэр кэскиллээх ыстаныык» — Виктория ЗАРОВНЯЕВА: наҕарааданы туттарда Чурапчы улууһун спордун салалтата.
Үс төгүл үс
I үрдэл: Валентин ВЛАСОВ (32м44см) — 6 000 солк.
II үрдэл: Роман ПОТАПОВ (31м67см) — 3 000 солк.
III үрдэл: Арчын СОБАКИН (28м67см) — 2 000 солк.
Бириис пуондатын туруордулар: Баһылай Манчаары аатынан өрөспүүбүлүкэтээҕи төрүт көрүҥнэри сайыннарар «Модун» спортивнай киин, Федоров Филипп Иванович, Кривошапкин Владислав Николаевич, Саввин Василий Васильевич, «Боотур Кыһата» интернат үлэһиттэрэ.
9 кылааска үөрэнэр Үөһээ Дьааҥыттан Роман Потапов кылыыга 26 м 99 см, 10 кылааска үөрэнэр маастарга кандидат Өлүөхүмэттэн Марк Никитин ыстаҥаҕа 27 м 70 см, 11 кылааска үөрэнэр Өлүөхүмэттэн спорт маастарыгар кандидат Валентин куобахха 24 м 00 см түһүтэлээнннэр, чаҕылхай көрдөрүүлэрдээх бастаатылар. Үс көрүҥ түмүгүнэн, 75 м 96 см көрдөрүүлээх Валентин Власов абсолютнай чөмпүйүөн үрдүк аатын ылла. Атах оонньуутугар дьоҕурдаах уолаттар Мырыла оскуолатыгар тренер Иван Иванович Чиркоевка эрчиллэллэр.
Үтүө тэрээһин түмүгэ. Бу күн турнир үрдүк таһымын, кыайыылаахтарга дьоһун наҕараадалары хааччыйар сыалтан, күрэхтэһии уопсай бириис пуондата 400 000 солкуобайга тиийэн, дьоҥҥо-сэргэҕэ үтүө холобур буолла. Күрэхтэһиини үрдүк таһымҥа тэрийэн-көҕүлээн ыыттылар сүрүн судьуйа, сахалыы ыстаныыларга спорт маастара Павел Дмитриевич Собакин, иһитиннэрэн-биллэрэн, үрдүк көрдөрүүлэри ситиһиллэригэр төрүтүнэн буолла күрэҕи сэргэхтик ыыппыт хапсаҕайдаһан тустуу спордун маастара Семен Иванович Собакин, судьуйаларынан үлэлээтилэр Россия уонна Саха сирин хотугу дэгит күрэскэ спордун маастара Михаил Петрович Соловьев, Чурапчытааҕы физкультура уонна спорт институтун орто үөрэҕин 1 курс үөрэнээччитэ Антон Захаров уонна сурук-бичик протокол өттүгэр үлэлээтэ Чурапчытааҕы физкультура уонна спорт институтун үрдүк үөрэҕин 4 курс үөрэнээччитэ Илана Никитина.
Күрэхпит үтүө түмүктэрин кэрэһэлиир оҕолор үрдүк көрдөрүүлэрэ ол курдук спорт маастарын, спорта маастарга кандидатын уонна маҥнайгы разрядтар нуормаларын куоһара түспүттэрэ буолар, ити улахан сыралаах үлэттэн уонна тэрээһинтэн тахсар. Бары кыайыылаахтары эҕэрдэлиибит! Инникитигэр өссө үрдүк чыпчааллары, чэгиэн туругу баҕарабыт!
Дьоруойдарбыт ааттара - үйэлээх, кинилэр сырдык мөссүөннэригэр сүгүрүйэбит!
Иһитиннэриини сырдатта Илана Никитина –
Чурапчытааҕы физкультура уонна спорт институтун
4 куурсун үөрэнээччитэ
