Нам, Амма, Мэҥэ-Хаҥалас, Чурапчы, Таатта, Өлүөхүмэ, Бүлүү, Үөһээ-Бүлүү, Ньурба, Сунтаар, Кэбээйи, Муома, Анаабыр, Орто-Халыма улуустарыттан, Дьокуускай куораттан 27 уоланнар “Дохсун” кыһыҥҥы стадион-манеж уораҕайыгар түмсэннэр түөрт путевканы былдьастылар.
Күөн-күрэс былдьаһааччылары Саха многоборьетын Федерациятын президенэ Алексей Пинигин, Дьокуускай куорат физическэй культураҕа уонна спорка Управлениетын начальнига Эдуард Ефимов, сүрүн судьуйа Иван Горохов эҕэрдэлээтилэр.
Маҥнайгы күн, “Үс төгүл үскэ” Валентин Афанасьев (Ньурба) 33 м 75 см көрдөрүүлээх бастаата. Владислав Попов (Нам) иккис, Алексей Уваровскай (Кэбээйи) үһүс; “Тутум эргииргэ” Алексей Уваровскай бастаата 65 эргийэн бастаата. Арсен Федотов (Мэҥэ-Хаҥалас) иккис, Алексей Созонов (Орто-Халыма) үһүс; мас-тардыһыыга Владимир Федоров (Ньурба) бастаата, Станислав Андросов (Чурапчы) иккис, Николай Матаннанов үһүс миэстэлэри ылаттаатылар.
Иккис күн, оҕунан ытыыга Арсен Федоров 15 очколаах бастаата, Валентин Афанасьев иккис, Дьулустаан Туприн (Муома) үһүс; 400 м сүүрүүгэ Алексей Созонов, Тимофей Большаков Сунтаар), Валентин Афанасьев; хапсаҕайга Давыд Колесов (Мэҥэ-Хаҥалас), Алексей Уваровскай, Владимир Федоров;
таас көтөҕүүгэ 140 м ыраахха илдьэн Николай Матаннанов бастаата, Алексей Ефимов (Муома), Давыд Колесов миэстэлэстилэр.
Түмүккэ, “Дыгын-2022” абсолютнай кыайыылааҕа, Кэбээйи боотура Алексей Уваровскай “3х3” үһүс, “тутумҥа” бастакы, хапсаҕайга иккис миэстэлэнэн, 34 очколаах бастаата. “Дыгын-2018, -2021, -2022” үрүҥ көмүс призера Николай Матаннанов икки көрүҥҥэ миэстэлэһэн, 40 очколаах иккис; Сунтаартан Тимофей Большаков сүүрүүгэ миэстэлэһэн, 40 очколаах үһүс; Үөһээ-Бүлүүттэн Владимир Шологонов 41 очколаах төрдүс миэстэлэнэн, бу сайын “Дыгын оонньууларын” финалыгар кыттыыны ыларга путевкалары ылаттаатылар.
Эчэйиилэрдээх “Дыгын-2022” кыайыылааҕа Алексей Уваровскай кыттан уонна кыайыыны ситиһэн, сэҥээриини үөскэттэ, туругар киирэн эрэрин көрдөрдө: “Кыһын чемпион Кубогар ылбыт эчэйиибин оһорунаммын кытынным. Сөбүлүүр атаҕым оонньуутугар сэрэнэн кытынным. Онтон, дьэ, арылынным. Хапсаҕайга санаам күүһүнэн кииристим. Уолаттар бары да бэлэмэрэ үчүгэй. Сайын өссө үчүгэй бэлэмнээх, кыахтаах уолаттар күүтэллэр. Эчэйиитэ суох эрэ тиийиэххэ наада. Реабилитация ааһыам, чөлбөр түһүөм. Формабар киирэргэ кыһаллыам. Чурапчы институтугар III кууруска үөрэнэбин. Дойдубар тиийбэтэҕим син ыраатта, баран ахтылҕаммын таһааран, дьарыктаныахпын, күүс-уох ылыахпын наада”.
Мас тардыһыытыгар уолаттарга Манчаары оонньууларын, өрөспүүбүлүкэ оҕолорун абсолютнай чөмпүйүөнэ, улахан дьоҥҥо үгүс турнирдар кыайыылааҕа, 80 кг Саха сирин чөмпүйүөнэ, спорт маастара, күрэс былдьаһыы күүрээнин, боотурдары үчүгэйдик билэттиир комментатор Борислав Степанов күрэхтэһиилэр хаамыыларын бэрт сэргэхтик кэпсээн-ипсээн сырдатта: “27 туруу уолаттар кыттыбыттара элбэҕи этэр. Бары кытта сылдьыбыт, уопуттаах уолаттар путевкалары ылаттаатылар. Сүүрбэлэрин туола илик эдэр уолаттар маастардар кэтэхтэригэр тыыналлара үчүгэй. Аҕыйах сылынан түһүлгэлэри киэргэтиэхтэрэ. Былыргы саха оонньууларынан дьарыктанааччылар элбээн, сайдан иһэллэрэ үөрдэр. Быһыылара-таһаалара, былчыҥнара көрөргө үчүгэйдэр, “рельефнэйдэр”. “Таастарын” ыйааһына да улааппытын улаханнык билиннэрбэтилэр. Уваровскай былырыыҥҥытын курдук буолбатах, лаппа хомуллубут, форматын тутан эрэр. Онон, “Туймаада” ыһыаҕар кытаанах киирсиилэр күүтүллэллэр”.
Саха многоборьебын Федерациятын президенэ, “Дыгын оонньууларын” сүрүн үбүлээччитэ, “Прогресс” тутуу тэрилтэтин ген.дириэктэрэ Пинигин Алексей Семенович: “2024 с. “Туймаада” ыһыаҕар буолар “Дыгын оонньууларыгар” сүүмэрдиир күрэхтэһиилэр түмүктэнэннэр, 12 боотурдар быһаарылыннылар. Сүрүн сыалбыт-сорукпут саха төрүт культуратын, историятын киэҥ эйгэҕэ билиһиннэрии, тарҕатыы. Кыттааччылар элбээн, география кэҥээн иһэр. Эдэр уолаттар бааллара үөрдэр. Тыа сириттэн төрүттээх буоламмын саха төрүт оонньууларын өйүүр мин эбээһинэһим дии саныыбын. Спордунан дьарыктанар ыччат этэ-хаана, өйө-санаата эргиччи сайдар, күүстээх-уохтаах, чэгиэн-чэбдик буолар. Төрүт көрүҥмүтүн илдьэ сырыттахпытына саха омук аата соргулаахтык ааттаныаҕа”.
Кыһын-саас үс түһүмэхтэринэн буолуталаабыт сүүмэрдээһиннэр түмүктэринэн, икки ыйынан быйылгы “Дыгын оонньууларын” финалыгар кимнээх кытталлара билиннэ.
Дьулустаан Ноговицын (Горнай), Артем Дьяконов (Кэбээйи), Айсен Ботуев (Үөһээ-Бүлүү), Яков Дмитриев (Кэбээйи);
Борис Сдвижков (Амма), Алексей Соколов (Сунтаар), Николай Обоев (Ньурба), Павел Друзьянов (Чурапчы);
Алексей Уваровскай (Кэбээйи), Николай Матаннанов (Таатта), Тимофей Большаков (Сунтаар), Владимир Шологонов (Үөһээ-Бүлүү) бастыҥы быһаарсыахтара. Сүрүн бириистэр хаһаайыннарынан, биллэн турар, ким күүстээх, үчүгэй бэлэмнээх, кыайыыга дьулуурдаах кыайыыны ситиһиэҕэ.
Боотурдар, кытаатыҥ!
Баһылай Посельскай
