Бу күрэхтэһии өссө 2008 сыллаахха Уус-Алдан улууһун Сыырдаах нэһилиэгэр волейбол эрэ көрүҥэр ыытыллыбыт буоллаҕына, 2013 сылтан бу тэрийэр тэрилтэ саҥа сүүрээни киллэрэр сыалтан, сүрүн састааптаах волейбол кыттааччылара аны дуобаттаан, сыал ытан уонна үс төгүл “куобахтаан” ыстаныыны киллэрбиттэр. Ол курдук, бу күрэхтэһии балаһыанньатынан: Республика нэһилиэнньэлээх пууннарыгар киирэр, автозаправочнай станциялаах нэһилиэктэр икки ардыларыгар “Туймаада-нефть” бирииһигэр күрэхтэһии тэрээһиннээхтик ыытыллыбытын бэлиэтиир тоҕоостоох.
Барыта аҕыс хамаанда, Хаҥаластан Улахан-Аан, Чурапчыттан Дириҥ, Мэҥэ-Хаҥаластан Майа, Дьокуускайтан “Туймаада-нефть”- икки уонна олохтоох I-кы Хомустаах хамаандалара икки күн олус интириэһинэй уонна тыҥааһыннаах оонньууну көрдөрдүлэр. Бары даҕаны эриэ-дэхситик, тэҥ киирсиилээх түгэннэри көрдөрөн күрэхтэһии тэрээһинин өрө туттулар. Икки күннээх ,бэрт эрийсиилээх уонна хатыһыылаах киирсии кэнниттэн, барыта 11 очкону хомуйан Майа сүүмэрдэммит хамаандата кыайыылааҕынан таҕыста. Барыта 15 очкону сурунан, “Туймаада-нефть” I-кы хамаандата иккис миэстэҕэ тахсан, кыайыы үөрүүтүн бастакынан биллилэр. Онтон үһүс миэстэни быһаарсыыга Улахан-Аан уонна Танда хамаандалара 17-лии очколанан, ол эрэн, хачыстыбанан Танда хамаандата үһүс миэстэни мүччү тутан ылла. Ордук үчүгэй уонна быһаарыылаах көрүҥүнэн,биллэн туран, волейбол буолла. Финал аҥарыгар түөрт хамаанда тахсыбытыттан, ордук үчүгэй бэлэмнээҕинэн Тандалар Майа хамаандатын кытта тэҥ оонньууга баһыйан кыайыы өрөгөйүн биллилэр. Онтон үһүс миэстэни былдьаһыыга Улахан-Ааннар Дириҥнэри баһыйа тутан ыллылар. Анал бириистэринэн: “Бастыҥ оонньооччунан” Тандаттан эдэр кэскиллээх оонньооччу Артем Сивцев, «Бастыҥ күүстээх охсооччунан” Майаттан Игнат Прохоров, “Бастыҥ көмүскээччинэн” Улахан-Аантан Василий Тимофеев, “Бастыҥ туруорааччынан» Дириҥтэн Спиридон Пестерев уонна "Туһалаах оонньооччунан» Сыырдаахтан Иван Данилов наҕараадаланнылар. Маны таһынан,икки күннээх бэрт сэргэх күрэхтэһиини төрдүттэн иилээн-саҕалаан ыыппыт олохтоох нэһилиэк (нэһилиэк аҕа баһылыга В.Г.Жирков), спорт дьиэтэ (директор С.М.Охлопков) уонна культура үлэһиттэрэ (директор Новгородова А.Н.) үтүө сыһыаннарын уурбуттарын бэлиэтээн туран, тэрийэр комиссия, күрэхтэһии кылаабынай судьуйата В.В.Кириллин барҕа махтал тылын тириэртэ. Онтон икки күнү быһа күрэхтэһии хаамыытын тохтообокко уустаан-ураннаан кэпсээбит, Руслан Баишев дьон сэҥээриитин ылыан ылла.
Анатолий Софронов – Онтуон.
