Спортинг көрүҥнэрэ элбэхтэр. Бу ааспыт өрөбүл күннэргэ "Квадро-Комбо-дуплет" диэн, ити аата да этэрин курдук, булка аналлаах автомат саанан ытыыларга күрэхтэстилэр. Бу көрүҥҥэ аан бастаан 2011 сыллаахха күрэхтэһии тэриллибитэ. Онон быйыл алтыс төгүлүн ыытылынна. Олус интэриэһинэй диэн кыттыыны ылбыт дьон хайгыыллар. Үрдүк мырааннар анныларыгар, хапчааннарга туруоруллубут "машинкалартан" утуу-субуу көтөн тахсар кытархай өҥнөөх тэриэлкэлэри табыталаан иһиэхтээххин. Үрэх баһыгар кустуу сылдьар түгэни санатар. Кус уонна тэриэлкэ көтүүлэрэ майгыннаһаллар. Кэтэспэтэх өттүгүттэн араастаан көтөн тахсаллар. Тэрийээччилэр кус булдун маарыннатан оннук оҥорбуттар. Балассааккаттан балассааккаҕа хаама сылдьаҥҥын ытыалыыгын. Ол аайы тэриэлкэлэрин көтөр хайысхалара уларыйан иһэр. Сүрүн уратыта, ити үөһэ эппиппит курдук, автомат саанан ытыылар. Тэриэлкэлэр көтүүлэрэ сыыйа уустугуран иһэр. Бастаан биирдиитэ, онтон иккилиитэ, онтон түөрт "кус-тэриэлкэ" көтөн кэлбиттэрин төрдүөннэрин эр-биир түөртүү ытыынан хаптаччы ытыалаан кэбиһиэхтээхин! Дьэ, дьиктитэ, эриэккэһэ итиннэ! Хайа булчут эр бэрдэ ыттаҕын аайы суулларарыттан астыныа суоҕай! Олус интэриэһинэй! Көтүүлэр төһө да ыарахаттарын, уустуктарын иһин, табыталыыр эрдьигэннэр бааллар.
Уол оҕо, эр киһи уйулҕата уһуктар бэрт сэргэх ытыы түһүлгэтигэр киин, өрүс илин эҥэр улуустартан, Үөһээ-Бүлүүттэн тиийэ кэлбиттэр. Булду улаханнык ытыктыыр, ылынар дьон түмсэннэр, бу күннээххэ ким ордук бэргэн ытааччы буоларын хас да бөлөххө араарыллан быһаарыстылар. Булка эрэ буолбакка, ытыы күрэхтэһиилэригэр улахан үөрүйэхтээх ытааччылар бааллар. Олор истэригэр, Степан Чепалов, Александр Макаров, Игорь Егоров, Николай Додохов, Афанасий Шишигин, Артур Николаев, Юлиан Иванов курдук спортиҥҥа спорт маастардара, Россияҕа тиийэ кыайыылары ситиспит ытааччыллар бааллар. Быйылгы Россия чөмпүйүөнүн, маастары толорон кэлбит "Берлога" булт маҕаһыынын бэргэн ытааччытын Сергей Кобяковы уруйдаан-айхаллаан, олохтоммут үгэс быһыытынан, үөһэ бырахпыт бэргэһэтин спорт маастардара кэчигирээн туран ытыалаатылар. Бэргэһэ табылыннаҕын аайы үөһэ күөрэйэр, сиргэ балачча буолан баран түстэ. Ити аата маастардар эдэр ытааччыны бэйэлэрин кэккэлэригэр киллэрдилэр. Спортиҥҥа уон үс Россия спордун маастара баар буолла. Маастардар кэккэлэрэ сыллата хаҥаан иһэр.
Хас биирдии кыттааччы сүүстүүтэ ытар. Эбиэккэ диэри 40, эбиэттэн киэһэ 60 ытыы. Бастыҥнар 100 очкоттан ким элбэҕи ылбытынан быһаарыллар. Балыйсыы, мөккүөр суох. Барыта чуолкай.
Маастардар уонна бастакы разрядтаахтар "А" категорияларыгар 68 табыы очколаах маастарга кандидаттар Евгений Шишигин (Мэҥэ-Хаҥалас), Александр Пестерев (Дьокуускай) 60 уонна Георгий Новгородов 57 (Хатас) табыылардаах, туһааннааҕынан, бастакы, иккис, үһүс миэстэлэри ылаттаатылар. Иккис-үһүс разрядтаахтар уонна саҥа саҕалааччылар "С" бөлөхтөрүгэр Вячеслав Пестерев - 46 (Амма), Николай Дьячковскай - 44 (Чурапчы), Павел Петров - 20 (Горнай) табыылардаах бириистээх миэстэлэргэ тигистилэр. Ветераннарга Василий Алексеев - 32, Николай Еттянов - 29, дьахталларга Нонна Миронова - 38, Дария Охлопкова - 17 очколардаах өйдөбүнньүк мэтээллэр, дипломнар, сыаналаах бириистэр хаһаайыттарынан буолан үөрдүлэр-көттүлэр. Бары да булка-аска сыһыаннаахтар.
Урбаанньыт Николай Дьячковскай хаһыс да төгүлүн маннык күрэхтэһиилэргэ кыттан "Минскэй" матасыыкыл, "Максус" диэн Германияҕа оҥоһуллубут спортивнай браунинг автомат-саа, убаһа, оҕус, ЖК-телевизор курдук улахан бириистэринэн наҕараадаланан мааһа табыллан сылдьар. Матасыыкылын сүөһү иитиитигэр бааһынайдыыр аҕатыгар сүүрдэн аҕалан туттарбыт. Германскай саатынан бултуур, практичнай диэн хайгыыр. Сааскы-күһүҥҥү кустарынан, андынан дьиэ-кэргэнин күндүлүүр. Эргэ "УАЗ" массыынаны таҥан-өрөмүөннээн, билигин хайа да бэйэлээх ууттан-хаартан иҥнибэт киэҥ сырыылаах-айаннаах. Ытыыга күрэхтэһии киһиэхэ сынньалаҥы, астыныыны-дуоһуйууну биэрэрин чорботон бэлиэтиир. Итинник туруу үлэһит, сахалыы сиэринэн айылҕаны таптыыр, чөл олох аргыстаах ыччаттар бааллар.
Хамаанданан түмүккэ “Вилюйтранс” бастаата, "Орто Дойду" иккис, "ККК" (Коля Додохов, Кеша Барашков, Коля Дьячковскай) үһүс миэстэлэннилэр. Кыайыылаахтар уонна миэстэлэспиттэр өйдөбүнньүк мэтээллэринэн, кубоктарынан, дипломнарынан, харчынан бириистэринэн биһирэннилэр.
Бу "Орто Дойду" ытыыга базатыгар ыытыллыбыт күрэхтэһииттэн сүүмэрдэнэн, Татарстантан кынат анньынан, "Бэргэн" ытыы базатыгар эрчиллэн, быйылгы норуоттар икки ардыларынааҕы "Азия оҕолорун" VI Спортивнай оонньууларыгар саҥа киллэриллибит стендэбэй ытыыга күрэхтэспит уолаттар Мичил Ноговицын (Чурапчы)кыһыл көмүһү, Коля Протопопов (Уус-Алдан), Вероника Иванова (Хаҥалас) үрүҥ көмүһү, Алеша Петров (Сунтаар), Саина Старостина (Хаҥалас) боруонса мэтээллэри ылаттаатылар! Тренердэрэ оҕо спордун Cалалтатыттан Аркадий Аркадьевич Петров.
Салгыы ырааҕы көрөр сыал-сорук туруоруллар. "Квадро-Комбо-дуплеты" Манчаары Оонньууларын программатыгар киллэриини ситиһэн, Сахабыт сирин сааһыттарын түмэн күрэхтэһиннэрии. "Дьэ, оччоҕо тахсыахтара этэ хоту дойду бэргэнник ытар булчуттара",- диэн санаатын үллэстэр ытыы спордун дьоһун көҕүлээччитэ Петр Андреев.
Өбүгэлэрбит төрүт дьарыктарын утумнаан, улахан спорка кубулутан, хааммытыгар баар сөбүлүүр көрүҥмүтүнэн дьарыктанарбыт сөп. Киһи сүргэтин көтөҕөр, барыбытын үөрдэр, киэн туттунууну үөскэтэр ситиһиилэр, кыайыылар кэлиэхтэрэ турдаҕа!
Баһылай Посельскай.
