Ханты-Мансийскай автономнай уокурук Нефтеюганск куоратыгар "Сургут" нефтехампаанньа норуот этноспордун көрүҥэр байдааркаҕа норуоттар икки ардыларынааҕы таһымнаах күрэхтэһиини тэрийэн ыытта. Финляндия, Венгрия, Исландия дойдуларын уонна Россия регионнарын 200-н тахса эрдииһиттэрэ кытыннылар. Сахабыт сириттэн тыынан күрэхтэһии көҕүлээччитэ, марафоҥҥа өрөспүүбүлүкэ спордун маастара, физкультура уонна спорт туйгуна, чөл олох аргыстаах, спорт куттаах Данил Пестряков тиийэн кытынна уонна аҕам саастаахтарга 18 буолан стаартаабыттарыгар биир килэмиэтир сири 28 мүнүүтэнэн түмүктээн иккис бириистээх миэстэҕэ тиксэн Кубогынан, дипломунан, спортивнай форманан наҕараадаланан кэллэ. Байдааркалаах күрэхтэһии сүрүн уратыта диэн эрдиилэрэ икки эрдинэрдээх буолбакка, биир эрдинэрдээҕэ буолбут. Ол иһин эрдиитин атыҥыраабыт. Омук дьоно уҥуохтарынан бөдөҥ, ыйааһыннара ыарахан буоланнар бытааннар диэн быһаарар. Саха сиригэр тыынан күрэхтэһиилэр тустарынан видео-киинэ көрдөрбүтүн улаханнык сэҥээрбиттэр.
Итини сэргэ "Туймаада" уйгу тунах ыһыаҕар оһуохайдьыттар куоталаһыыларыгар көхтөөхтүк кыттан Хотугу Форум анал путевкатынан биһирэнэн, Хотугу Форум салайааччыта Александр Погодаевы кытта ити этноспорт Аан дойдутааҕы Фестивалыгар кыттар бырааптаммыттар. Инньэ гынан спорду уонна культураны өрө тутар икки саха киһитэ аҥардас күрэхтэһиинэн эрэ муҥурдамматахтар. Балтараа мүнүүтэлээх культурнай программа чэрчитинэн Фестиваль үөрүүлээх быһыыга-майгыга аһыллыытыгар эмиэ кыттыбыттар. Норуот үҥкүүһүтэ Афанасий Афанасьевка анал бэлэмнэниини ааспыттар. Данил Пестряков сахалыы таҥнан, ыллаан-туойан, үҥкүүлээн сөхтөрбүт, хатыламмат кэрэ айылҕалаах, үлэҕэ-олоххо көхтөөх дьонноох, тапталлаах Сахатын сирин үтүө-мааны өрүттэрин киэҥник билиһиннэрэн сөҕүүнү-махтайыыны ылбыт. Байдааркалаах күрэхтэһии спортивнай-культурнай дьаһалларын губернатор уонна депутаттар бэйэлэринэн салайаллар, үүннүүллэр-тэһииннииллэр эбит.
Данил Михайлович кэпсииринэн, Ханты-Мансийскайга, син эмиэ биһиэхэ курдук, төрүт былыргы норуоттар оонньууларын сүрдээҕин өрө туталлар, анаан-минээн дьарыктаналлар эбит. Нефтеюганскайга баар сынньалаҥ Дьиэтигэр хас да спорт көрүҥнэрин түмэр бэртээхэй этноспорт базатын тэрийбиттэр. Кауртаев Анатолий Прокопьевич диэн байдааркалаахтар күрэхтэһиилэрин 1970-с сыллардаахха аан-бастаан көҕүлээн тэрийбит, ол дойду үтүөллээх үлэһитэ, улаханнык ытыктанар киһи тустууну төрүттээбит тренердэри Дмитрий Петрович Коркинныын Ленинградка бииргэ үөрэммиттэр, Василий Гаврильевич Румянцевы, Кирилл Петрович Григорьевы уонна Николай Николаевич Тарскайы үчүгэйдик билэттиир үһү.
Онон икки күннээх күрэхтэһиигэ элбэҕи билбит-көрбүт.
Тыынан уонна байдарканан күрэхтэһиилэр ис хоһооннорунан улаханнык майгыннаһалларын бэлиэтиир. Тыы спордун саха национальнай көрүҥүн быһыытынан күүскэ сайыннарыахха, тэнитиэххэ баар эбит диэн ааҕар. Ыраас, чэгиэн салгыҥҥа сылдьар буолаҥҥын уонна киһи былчыҥнара эргиччи сайдалларынан киһи доруобуйатыгар олус туһалаах көрүҥ. Данил Пестряков Чурапчы Чыаппаратыттан төрүттээх-уустаах, билигин Новопортовскай орто оскуолатыгар физкультура учууталынан үлэлээбитэ үһүс сыла. Дойдутугар тыынан күрэхтэһиини көҕүлээбитэ уонча сыл буолла. Уус-Алдан, Дьокуускай, Нам, Хаҥалас, Чурапчы сыллата күрэхтэһиилэргэ кытталлар. Оннооҕор, Усуйаанаттан, Томпоттон тиийэ кэлээччилэр. Сүнньүнэн, тыынан күрэхтэһиилэргэ булчуттар уонна сүһүөхтэрин үрдүгэр сылдьар спорт аргыстаах дьон, ыччаттар кытталлар. 2013 сыллаах Манчаарыга Эбэҕэ көрдөрүүлээх күрэхтэһии тэриллибитэ. Уус-Алдан, Чурапчы биллиилээх хайыһардьыттара, сүүрүк-быһый дьоно Николай Васильевич Захаров, Гаврил Федорович Нохтуунускай, Уус-Алдантан Николай Александрович Окоемов, эдэр эрдииһиттэр Валентин Аммосов, Василий Степанов тэҥ саастыылаахтарыгар хастыыта да бастаталаабыттара. Бэйэтин сааһыгар холооно суох тэтиэнэх Николай Александрович Окоемов абсолютнай чөмпүйүөн үрдүк аатын ылаттаабыта. Сааһын тухары суоппарынан үлэлээбит Егор Михайлович Пермяков, билисэпиэттиирин сөбүлүүр физкультура учуутала Иван Пермяков эмиэ үчүгэй эрдииһиттэр.
Ил Түмэн депутата, Олимпийскай чөмпүйүөн Павел Павлович Пинигин дириэктэрдээх "Триумф" спорка бэлэмнэнии киинин Кубогар Сайсары күөлгэ өрөспүүбүлүкэ таһымнаах Дьокуускай куорат дьаһалтата туруорбут бириистэрин хаһаайыттарынан күүстээх эрдииһиттэрдээх Уус-Алданнар буолбуттара.
Быйыл балаҕан ыйыгар күүтүллэр күрэхтэһии эһиил баарыстаах спорка Римнээҕи Олимпийскай чөмпүйүөн Тимир Алексеевич Пинегин төрөөбүтэ 90 сылыгар анаан ыытарга бэлэмнэнии курдук тэриллиэҕэ. Дьокуускай куорат Күнүгэр. Балаһыанньатын быһыытынан, сааһынан хас да бөлөххө араарыллан күрэхтэһиэхтэрэ: 18-40, 40-50, 50-60, 60-70 уонна 70-н үөһэ саастаахтар. Дьахталлар саастарынан араарыллыбаттар. Биирдиилээн уонна хамаанданан бастыыр иһин күрэхтэһии. Абсолютнайдаах. Бука бары Сайсары күөлү эргийэ 2 килэмиэтиргэ тыынан эрдиниигэ куоталаһыахтара. Хамаандалар тыыларын аҕалыналлар. Итиэннэ Данил Михайлович Пестряков бэйэтэ оҥостуммут тыылардаах, тыыта суохтар ол тыылары уларсыахтарын сөп. Кыайыылаахтарга өйдөбүнньүк мэтээллэр, анал бириистэр, Кубоктар туттарыллыахтара.
Саха биир дьикти дьарыгар тыынан күрэхтэһиигэ көхтөөхтүк кыттыҥ!
Баһылай Посельскай.
